پـکّـا نبوتگين «طرفداران چپ در بلوچستان»

چنت رؤچی بيت که لفٹ بلوچستان (طرفداران چپ در بلوچستان)ءِ وبتاکا په وتی بلوچی وبتاکانءِ ليسٹ گيش کتگان. بلوچان دنياءِ هر کؤنڈ که بـبنت، هربلوچی آوازی که آيیءِ گؤشان بکپ ايت يا بلوچءِ باروا نبشتانکی بگنديت، يا چَـکّ جنت يا نوشتانکا وانـيـت. منی هيالا شرين هيلی انت. چه هيل اگن کمّيے ديماتر بچارين، راجی بزان ملی دؤستی ءُ واهگ هن اے هيل تها پکّا گندگ بيت.
مروچان راجی هؤربندی (طرفداران ملی در بلوچستان) رند چه بازين سياسی ءُ فلاسفی گرءُ هلّ ءُ بازين زؤرانسریانی که چه ڈنی راجان مے سرا اير آتکگ اَنت، ما را په اے کـَٹ ءُ تجربت رسينـتگ که ما گؤن هرچؤنين سياسی هيالی، په بلوچستانءِ ردؤم ءُ ديمرهی توانين جهد بکن اِن.
اگان هژدهمی کرنءِ تها چمشانکيے اير بدين، مارکسيزمءِ پيدائش گؤن انگريز ءِ اروشان په اے دگه ملکان ءُ هنچوش آيیءِ نيشن بلڈينگءِ سياست، همزمان اَت.
بے شک مارکس گؤن آ مرز ءُ سيمسران که انگريزءِ امپريه يا تيموری ءُ تزاران جؤڑ کتگ اتـنت، مخالف ات.
"ايران"ءِ پيدايش ءُ دگه بازين بلڈينگی هما امپريهانی نشان ءُ واهگ انت که هچ کس په آهانی زورانسریا شک نکنت ءُ هنگت هن چه اے بلڈينگان هررؤچ بازين کَـٹّ ءُ سؤبيے آهانا نصيب بيت.
ادان آيديولوجی ءُ فلاسفی باروا تران کنگ منی مکسد نه اِنت. منا په ڈيموکراٹيکين دولت ءُ هکومتی هما اندازگ ايمان هست که په انسانانی عقيدهانی آزاتی.
مکسد چه وتی ايمانءِ درانگاز کنگ ايشت که يکراست بروان نيشنءِ بحثءِ سرا.
بغير چه لهتے فونڈامنٹال ملا، مے بلوچ سوسايٹی ءُ دانشوران په يک آزاتي لؤٹين هکومتی همشؤراَنت که بےشک لفٹ گروپانا هن هوار ءُ شامل بيت. چوشين آتمسفرءِ تها که آيیءِ اولی آدرس ءُ نام « بلوچ ڈيموکراٹيکين سوسايٹی انت»، پيش چه هرچيز ما را په همے آدرسءِ شرکنک، ردؤم ديگ ءُ انسانی کنگ زرورت گندگ بيت. دويمی آدرس( اگان مے دست برسيت) دگه راجان ءُ آسر درستين دنياءِ کمک ديگءُ شر کنگ ديما کيت.

شما زان اِت که رضا عباسقلی(رضاميرپنج) ءُ اردشيرجی گؤن انگريز امپريهءِ پشتءُ پناه، چؤنين اروشی په بلوچ، احوازی ءُ کوردءِ سرا کت. رند چه بازين اروشان په اے دگه ملکان، اشان دان هما اندازگ سؤبين بوت انت که توانـت اَنت چنڈيے چه بلوچستان ءُ چنڈيے چه آذربايجان ءُ... په زورانسری بگراَنت ءُ بلڈينگی جؤڑ بکن اَنت که آيیءِ نام "ايران" يا " اوگانستان" .. بوت. نوں اے جستان ديما کاينت که بارين، 1 ـ کمونيستان که په "جهان وطنی" عقيده اش هست، پرچا رضاميرپنچءُ انگريز امپريهءِ کشارانی تؤکا کپتگ اَنت؟ 2 ـ همے کشارءِ تؤکا پرچا چه «بلوچ» راجءِ نام کارمرزی گراَنت؟ 3 ـ بارين آ کمونيستان که وتا پکّـا معرفی کتگ انت ءُ بلوچستانءِ« آجوئیا » لؤٹ اَنت، کمونيست گوشگ نه بنت؟

چه آ جاگها که هر انسانی چه وتی شخصی ءُ سوسايٹی اؤبالان ديمپانی کنت، په بازين بلوچی اے جست ديما کيت که، مکنے شويونيستان اے نقشه اش کشتگ انت که گؤن (طرفداران چپ در بلوچستان)ءِ ناما، بلوچ راجءِ تؤکا تقرقه هيرّ بدينت ءُ چه اے راه بلوچ راجءِ « راجی بزان ملی » واهگانا پرؤش بدينت!! چيا که " طرفداران چپ در بلوچستان" بے ايش که وتی سياسی پروگراما شنگ بکن انت، پڑ ءِ تؤکا دَؤر کتگ!!

اميت انت اشان هرچؤنين انت، وتا پکّـا درشان ءُ معرفی بکن انت دان، هزار مار وارتگين بلوچ راج گؤن آهانی زانگ پـدّر بوئگ آسودگ به بنت.

راجءِ کستر الس پهره ای